Yeniliklər

 20.10.2016: “Sağlamlıq-2016” spartakiadasında “Dama” oyunlarına yekun vurulub

Rabitə və yüksək texnologiyalar sahəsi işçilərinin peşə bayramı və ölkəmizdə telefon rabitəsinin yaradılmasının 135 illiyi ilə əlaqədar “Sağlamlıq – 2016” rabitə işçilərinin Respublika Spartakiadası davam edir.

Spartakiada çərçivəsində keçirilən “Dama” oyunlarına yekun vurulub.

İlkin mərhələdə hər birində 4 komanda, hər komandada 3 nəfər olmaqla A və B qrupları arasında yarış keçirilib.

Final mərhələsində A qrupundan “Azərpoçt” MMC və Məlumat Hesablama Mərkəzinin (MHM), B qrupundan isə Dövlət Radiotezliklər İdarəsi (DRİ) və Bakı Telefon Rabitəsi İstehsalat Birliyinin (BTRİB) komandaları yarışıblar.

Yekun mərhələyə vəsiqə qazanmış komandalar turnirin birinci yeri uğrunda mübarizəni dairəvi sistem üzrə davam ediblər.

Beləliklə, ”Dama” oyunu üzrə gərgin mübarizə şəraitində yarışan 8 komanda arasında fərqlənən BTRİB-in komandası DRİ-nin komandasını 2:1 hesabı ilə məğlub edərək 1-ci yerin qalibi olub.



 03.10.2016: Bakı Telefon Rabitəsi İstehsalat Birliyi əmtəə nişanı və veb-saytını yenilədi

Rabitə və Yüksək Texnologiyalar Nazirliyi Bakı Telefon Rabitəsi İstehsalat Birliyi (BTRİB) həyata keçirilən islahatlar çərçivəsində yeni əmtəə nişanını təqdim edib. Bu gündən etibarən Bakı Telefon Rabitəsi İstehsalat Birliyi “Baktelecom” əmtəə nişanı ilə fəaliyyətini davam etdirəcək. Rebrendinq prosesi çərçivəsində yeni loqo da formalaşdırılıb.

Yeni loqo Morze əlifbası ilə “1881 BTC” simvollarını ehtiva edir. Loqodakı 1881 rəqəmi Azərbaycanda ilk telefon xəttinin istismara verilməsi tarixinə işarədir, “BTC” isə “baktelecom” sözünün qısaldılmış formasıdır. Məlumat üçün qeyd edək ki, Morze əlifbasından rabitə tarixində ilk ünsiyyət vasitəsi kimi istifadə olunub.

Eyni zamanda, BTRİB bu gündən etibarən yeni veb-saytını –www.baktelecom.az da istifadəçilərin ixtiyarına verib.

Müasir standartlara cavab verən yeni veb-sayta daxil edilmiş funksiyalar sayəsində istifadəçilər BTRİB-ə aid bütün xidmətlər haqqında ətraflı məlumat əldə edəcək, müəssisənin fəaliyyət dairəsinə aid olan xidmətlərdən onlayn şəkildə yararlanacaq və telekommunikasiya sahəsində baş verən ən son yeniliklərdən xəbərdar olacaqlar.

Saytdakı “Mənə zəng et” funksiyası vasitəsi ilə abunəçi çağrı mərkəzi ilə əlaqə saxlamaq üçün uyğun vaxt seçə və Mərkəz operatorunun onunla əlaqə saxlamasını təmin edə bilər.

“Şəxsi kabinet” bölməsi abunəçinin istifadə və ödəmə tarixçəsini özündə əks etdirməklə mövcud borcu göstərmək imkanına da malikdir.

Həmçinin “Onlayn ödənişlər” bölməsində istifadəçi məsafə qət etmədən BTRİB-in təqdim etdiyi xidmətlər üzrə ödənişlərini həyata keçirə bilər.

“Onlayn çat” bölməsində hər hansı səbəbdən telekommunikasiya qovşaqlarına gələ bilməyən abunəçinin müraciəti müştəri xidmətləri operatoru tərəfindən dərhal cavablandırılır.

Bundan başqa, yeni veb-sayt vasitəsilə BTRİB-in təklif etdiyi yeni və sərfəli kampaniyalar haqqında məlumatlar almaq mümkündür.



 26.02.2016: Rabitə və Yüksək Texnologiyalar Nazirliyində Xocalı soyqımı qurbanları anılıb.
Rabitə və Yüksək Texnologiyalar Nazirliyində Xocalı soyqımının 24 illiyi ilə əlaqədar rabitəçi xocalılarla görüş keçirilib.

Xocalı faciəsinin anıldığı tədbirdə bu unudulmaz tarixi günlərdə vətənin və xocalıların müdafiəsi uğrunda rabitəçilərin qəhrəmanlığıdan söz açılıb. Qeyd olunub ki, onların bu fədakarlığı unudulmur və hər bir rabitəçi üçün böyük bir örnəkdir.

Tədbirdə qeyd olunub ki, bu ağlasığmaz dəhşətlər Ermənistan tərəfindən ölkəmizə və xalqımıza qarşı yürüdülən işğalçılıq və etnik təmizləmə siyasətinin tərkib hissəsidir. Bildirilib ki, Xocalı şəhərinin dinc əhalisinə qarşı vəhşicəsinə törədilən kütləvi qırğının, soyqırım həqiqətlərinin dünya ictimaiyyətinə çatdırılması məqsədilə Heydər Əliyev Fondunun vitse-prezidenti Leyla Əliyevanın təşəbbüsü ilə aparılan “Xocalıya Ədalət” Beynəlxalq Kampaniyası artıq öz bəhrəsini verir. Aparılan təbliğatın nəticəsi olaraq, hazırda dünyanın 12 ölkəsində, o cümlədən ABŞ-ın 13 ştatında soyqırımın tanındığı və Xocalı faciəsinin yalnız Azərbaycanda deyil, ölkədən kənarda da müxtəlif xarakterli tədbirlərlə anıldığı bildirilib.

Daha sonra 8 gün erməni terrorçularının əsarətində qalmış rabitəçi Dürdanə Ağayevanın müəllifliyi ilə Türkiyədə nəşr edilmiş “Ermeni zindanında sekiz gün” adlı kitabın təqdimatı olub. “İnsani və Sosial Araşdırmalar Mərkəzi” tərəfindən çap edilmiş kitabdan söz açan müəllif erməni vəhşiliyinin iç üzünün açılması, dünyaya tanıdılması məqsədilə Azərbaycan xalqının başına gələn faciəni öz timsalında qələmə aldığını, bu nəşrin gələcək nəsillər üçün tarixi mənbə ola biləcəyini qeyd edib.

Tədbirdə qətliamın canlı şahidi olan digər rabitəçilər, o cümlədən 28 şəhid vermiş Əsli Məmmədova, Brilyant Hacıyeva, Dürdanə Qafarova, Cavid Əliyev çıxış edərək, soyqırımın yaratdığı dəhşətli və unudulmayacaq təəssüratlarını bir daha paylaşıblar.

Xatırladaq ki, Xocalı qətliamı zamanı Azərbaycan xalqı yüzlərlə şəhid verib, 613 nəfər Xocalı sakini qətlə yetirilib, 8 ailə tamamilə məhv edilib, 25 uşaq hər iki valideynini, 130 uşaq valideynlərindən birini itirib, 1275 xocalılı əsir, 150 xocalılı isə itkin düşüb.

Bütün xəbərlər.

Online Ödəmə
E-poçt
Sürətini Yoxla!